“Katiko ado ditahan
Lah tak ado baru dimakan
Bakulimaik sabalun habih
Ingek ingek sabalun kanai.
Asa lai jio-jio patuang
Asa lai angok angok bauang
Nan tidak dicari juo
Batanam nan bapucuak
Mamaliharo nan banyawo
Dibaliak baliak mangko dibalah.
Dek caba mako mularaik
Dek himaik mako kayo
Dek ameh mako kameh
Dek padi mako manjadi.
Pangka cadiak kuaik batanyo
Pangka arih suko barundiang
Pangka kayo hiduik bahimaik
Pangka mularaik karano pamaleh
Pangka hino dek paduto
Pangka maliang dek panjudi
Pangka pandeka capek kaki ringan tangan
Pangka pandai rajin baguru
Nak jan sasek rajin batanyo
Nak mulie basiluruih hiduik.
Bahimaik sabalun habih
Sadiokan payuang sabalun hujan
Manjilih ditapi aie
Maradeso diparuik kanyang.
Kayu hutan bukan andaleh
Elok dibuek ka lamari
Tahan bahujan namuah bapaneh
Baitu caro mancari rasaki.
Sasek di ujuang jalan
Baliak ka pangka jalan
Takuik di ujuang badie
Lari ka pangka badie.
Diatue cupak nan duo
Dikaji kato nan ampek
Dalam tambo lah tasuo
Disinan paham mangkonyo dapek.
Barang nan tingga didatakan
Mauleh mano nan singkek
Malunakkan mano nan kareh
Manganduekan mano nan tagang
Marapekkan mano nan jarang
Manjinakkan mano nan lia
Mamanuahkan mano nan lakang.
Adaik limbago ateh dunie
Sampik lapang ka dirasai
Sakik sanang pamainan hiduik
Hiduik mati dirasai juo.
Jikok mamacik taguah taguah
Jikok manimbang samo barek.
Dek rajin pandai nan datang
Dek malu buruak nan tumbuah
Hari pagi mananti patang
Dikana diri sarato tubuah.
Indak bak karabang talue itiak
Eloknyo tabuang sajo
Indak babaliak ka dapue lai
Elok tungkuih tak barisi
Gadang agak tak manyampai.
Kok tasangkuik elok di nan tinggi
Kok basanda elok di nan gadang
Dibaliak pandakian ado panurunan
Dibaliak panurunan ado pandakian
Elok diambiak jo etongan
Buruak dibuang jo mupakaik.
Bakato sapatah dipikiri
Bajalan salangkah maliek suruik
Muluik tadorong ameh pandahannyo
Kaki tataruang inani pandahannyo
Urang pandorong gadang kanai
Urang pandareh hilang aka.
Salah tariak mangumbalikan
Sasek suruik talangkah kumbali
Salah pado Allah Tobaik
Salah ka manusia minta maaf
Kok gawa maisi
Adie nan ka dipakai.
Babatulan babayaran
Basalahan bapatutan
Jikok jauah bahambatan
Jikok dakek batungguan
Jikok barabuik katangahkan.
Suarang diagiah, sakut dibalah
Utang babaie, bapituang ditarimo
Kok manyalang dikumbalikan.
Kok nan elok tapabuek
Basaluak carano datang
Kok nan buruak tapabuek
Batimbun sabuik dipungguang.
Cancang latiah niniak moyang
Tambilang basi rang tuo tuo
Ditabeh sanak baluka
Dibuek banda baliku
Tatumbuak di bukik bagali
Tatumbuah dibatu dipahek
Tibo dibatang dikabungi
Ditaruko makonyo jadi.
Duduak marauik ranjau
Tagak maninjau jarak
Hari sahari dipatigo
Malam samalan dipahampek
Nan barisuak bukan kini
Nan kini bukan kapatang
Satitiak jadikan lauik
Sakapa jadikan gunuang.
Manilantang lalok mambilang kasau
Manungkuik lalok mahetong lantai
Mahereang lalok mambilang dindiang.
Sakali mambuka puro
Duo tigo utang salasai
Sakali mandayuang biduak
Duo tigo pulao talampaui.
Mangurangi ancak ancak
Malabiahi sio sio
Mamakan habih habih
Manyuruak hilang hilang.
Manusia tahan kieh
Binatang tahan palu
Kilek camin lah kamuko
Kilek baliuang lah kakaki
Tagisia labiah bak kanai
Tasingguang labiah bak jadi.
Basilek diujuang lidah
Manikam diujuang karih
Bamain di ujuang padang
Tahan dikieh kato putuih
Tahu dikilek sarato bayang
Tahu digelek kato habih
Tahu dihereang jo gendeang
Sarato kurenah jo bainah
Tahu dirantiang kamalantiang
Tahu didahan nan kamahimpok.
Baburu ka pinang data
Dapek ruso balang kaki
Kalau baguru kapalang aja
Bagai bungo kambang tak jadi.
Anjalai tumbuah dimunggu
Sugi sugi dirumpun padi
Nak pandai sungguah baguru
Nak tinggi tingkekkan budi.
Katiadoan ameh buliah dicari
Katiadoan aka putuih bicaro
Tak baameh putuih tali
Tak barak taban bumi.
Kurai taji pakan sinayan
Urang tuo manggaleh lado
Capek kaki ringan tangan
Namun salero lapeh juo.
Pitalah rami balainyo
Urang sumpu manjua lapiak
Sasuku gulo sakati
Tanah sabingkah alah bapunyo
Rumpuik sahalai lah bamiliak
Malu nan alun dibagi.
Barakik rakik ka hulu
Barang ranang katapian
Basakik sakik dahulu
Basanang sanang kamudian.
Laka jo dulang dalam lubuak
Sasah tali barendo bukan
Aka hilang paham tatumbuak
Basarah diri pado Tuhan.
Urang pamberang tangga iman
Urang pambangih hilang aka
Urang pandareh lakek kanai
Urang pancameh mati jatuah
Urang parentak gadang kanai
Urang pamanjek mati jatuah
Urang panyalam mati lameh
Urang pamanggok lapa paruik
Urang pandingin mati hanyuik
Urang paningadah kalimpanan
Urang panyaba kasihan Allah.
Pangka cadiak kuaik batanyo
Pangka kayo himaik jo luruih
Pangka mularaik maleh jo duto
Pangka maliang suko jo judi
Pangka pangdeka capek kaki ringan tangan
Pangka pandai rajin baguru.
Mancancang balandasan
Mamikue bapa aleh
Bajalan ba aleh tapak
Malompek batumpuan
Mangaie baumpan
Bakato batipuan.
Balaie manuju pulau
Malantiang manuju tampuak
Bakato manuju bana.
Patah kapak batungkek paruah
Patah paruah batilakan
Sataba taba pungguang ladiang
Kok diasah katajam juo.
Bia alah sabuang asa manang sorak
Bia kaniang baluluak asa tanduak makan
Bia bagantuang diikue anjiang asa salamaik kasubarang.
Bukan dek takuik mandi kini
Hanyo den takuik mambuang jalo
Bukan den takuik mati kini
Hanyo den takuik hiduik marano.
Baranang kahulu aie
Jan lupo dirantiang lapuak
Alah sanang hiduik didunie
Kana juo kamati isuak”..
[Buku: Kato Pusako Minangkabau, Oleh: A.B Datuak Majo Indo].
Direkomendasikan oleh Adv. Addy djulizal Masdar, S.Ag (Advokad, Penulis, Wartawan Demokratis Sumbar)
